خانه / آخرین اخبار / تبریز بیلیم یوردو(دانشگاهی) دونیادا ۷۷۷‌_جی رتبه‌نی قازاندی

تبریز بیلیم یوردو(دانشگاهی) دونیادا ۷۷۷‌_جی رتبه‌نی قازاندی

تبریز بیلیم یورد(دانشگاه)نون رئیسی دئدی: " آمریکانین اعتبارلی پایگاهی، یو.اس.نیوزون وئردیگی رئیتیگ‌لره گؤره، تبریز بیلیم یوردو بیرینجی دفعه اولاراق، دونیانین ان یوکسک بیلیم یوردلاری آراسیندا یئرآلدی."

یول‌پرسین آلدیغی بیلگی‌لره گؤره، تبریز بیلیم یورد(دانشگاه)نون رئیسی، محمدرضا پورمحمدی دئدی: ” بو رئیتیگ‌ده بو بیلیم یورد(دانشگاه)، بیلیم باخانلیغی‌نین دؤولتی بیلیم یوردلاری آراسیندا ۷_جی و بیتؤو بیلیم یوردلار او جومله‌دن طیب و آزاد بیلیم یوردلاری آراسیندا ۹_جو‌دور.”

او آرتیردی: ” تبریز بیلیم یوردو یو.اس.نیوزون بو رئیتینگ‌لرینده، دونیانین ۱۰۰۰ سایی‌دا یوکسک سویه‌لی بیلیم یوردو آراسیندا اؤزونه یئر آلیب و دونیانین ۷۷۷_جی رئیتینگی‌نی قازانیب‌دیر.”

اونون سؤزلرینه گؤره، صنعتی شریف، تهران، صنعتی اصفهان، صنعتی امیرکبیر، کرج‌ده اولان آزاد اسلامی ، علم و صنعت ایران، علوم پزشکی تهران، تربیت مدرس، تبریز، فردوسی مشهد و علوم پزشکی شهید بهشتی، بیلیم یوردلاری اؤلکه‌ده ۱دن۱۱قدر رتبه‌لری قازانابیلیب و دونیانین ۱۰۰۰سایی‌دا یوکسک سویه‌لی بیلیم یوردلاری‌نین جرگه‌سینده اولسون‌لار. او آرتیردی: ” هابئله یو.اس.نیوزون بو رئیتینگ‌لرینه گؤره، بو بیلیم یورد(تبریز) دونیادا مهندسی وشیمی بؤلوم‌لرینده۱۵۲ و ۳۷۵ رتبه‌لرینی قازاناراق، بو بؤلوم‌لرده، بؤلگه(اورتادوغو)‌نین ان یاخشی بیلیم یوردلاری تانیلیب‌لار.”

یو.اس.نیوز دونیانین رئیتینگ وئرن قوروم‌لاریندان بیری‌سی ساییلیر کی ۱۹۸۳ده آمریکا بیلیم یوردلاری‌نا رتبه وئریب‌دیر. بو قوروم ۳۰ ایلدن آرتیق تجربه‌ایله، ۲۰۱۵٫م ایلده دونیا بیلیم یوردلاری‌نا رئیتینگ وئرمه‌یه باشلادی.

تبریز بیلیم یوردو اسکی‌لیک باخیمیندان اؤلکه‌نین ایکینجی بیلیم یوردو و ۸۰۰نفر علمی هئیتی‌ایله و ۲۴ مین نفر اؤیرنجی‌ایله، اؤلکه‌نین ان اؤنملی و یوکسک سویه‌لی بیلیم یوردلاریندان ساییلیر.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *