خانه / آخرین اخبار / آذربایجانین تانینمیش مداحی دونیاسی‌نی ده‌ییشدی

آذربایجانین تانینمیش مداحی دونیاسی‌نی ده‌ییشدی

آذربایجانین آدلیم و بؤیوک مداحی، اردبیل‌لی سلیم موذن‌زاده، بو گون صوبح چاغی 80 ایلدن سونرا، بو دونیانی ترک ائدیب و ابدی یاشاییشا باشلادی.

یول‌پرسین آلدیغی بیلگی‌لره گؤره، آذربایجانین گؤزل سسلی و اهل بیت‌چی مداحی، سلیم موذن‌زاده (سلطان الذاکرین)، بو دونیادان کؤچوب و ابدیته قووشدو.

اؤلکه‌نین بیر چوخ مسئولو بو آجی اولایی تسلیت دئییب‌لر

اونلار اؤز سؤزلرینده او رحمتلیگین بؤیوک مقامینا توخونوب و یاخشی‌لیگ‌لارین ساییب‌لار، او جومله‌دن: جومهور باشقانی حسن روحانی، ایرشاد باخانی سید رضا صالحی، جومهور باشقانین ائتنیک‌لر و دین‌لر کؤمکچی‌سی علی یونسی، شورای اسلامی پارلمانی‌نین تورک میللت وکیل‌لری و قادین‌لار فراکسیونو، اردبیل اوستانی‌ ایرشادی‌نین گنل مودورو حجت‌الاسلام مهدی ستوده، اردبیل امام جومعه‌سی آیت‌الله سید حسن عاملی، اردبیل اوستانی‌نین میراث فرهنگی ایداره‌سی‌نین گنل مودورو کریم حاجی‌زاده، قورآن تلوزیون شبکه‌سی‌نین باشچی‌سی محمدحسین محمدزاده، ایران موسیقی درنه‌کی‌نین باشچی‌سی بهرام جمالی و…

هابئله بعضی شخص‌لر، علی دایی کیمی، تسلیت‌لرینی اؤز اینیستاگرام سایفالاریندا بیلدیریب‌لر.

سلیم موذن‌زاده هاردا دفن اولاجاق؟

بعضی‌ سؤزلره گؤره، سلیم موذن‌زاده گئچن ایل، غدیرخم بایرامیندا، جیسمی‌نین ایمام رضا(ع) قبری‌نین جیواریندا قویلانماسینی ایسته‌ییب‌دیر. آما بو باره‌ده او رحمتلیگین اوغلو دئییب‌دیر: “آتام حیاتی‌نین سون آن‌لارینا قدر، هارادا دفن اولماسی‌ایله باغلی، اؤز عاییله‌سینه، دوست‌لارینا و تانیش‌لارینا هئچ بیر وصیت ائتمه‌میشدی.”

رحمتلیک سلیم موذن‌زاده‌نین توپراغا تاپشیرماسی هماهنگی‌لیغی اوچون قورولان اوتوروم‌لاردا، بو قرار وئریلیب‌دیر کی صاباح چهارشنبه، آذر آیی‌نین ۳ – جو گونو، ناهاردان سونرا، ساعات۱۵ده، اردبیل ایمام جومعه‌سی‌نین ایماملیغی‌ایله قیلینان اؤلو نامازیندان سونرا، تشییع جینازه تؤره‌نی، اردبیل مصلی‌سیندان باشلانیب و بو شهرین شریعتی میدانینا قدر دوام ائده‌جک‌دیر.

ایندیه قدر یاییلان بیلگی‌لره گؤره، بو بؤیوک مداحین جنازه‌سی، اردبیلین بهشت زهرا قبریستانی‌نین، مفاخر بؤلومونده توپراغا تابشیریلاجاق‌دیر.

رحمتلیک موذن‌زاده، ساغ واختیندا ائتدیگی وصیته گؤره، صاباح اردبیل‌ده “زینب زینب” سسله‌نه‌جک‌دیر.

صاباح اردبیل تلوزیونوندان تشیع تؤره‌نی جانلی شکیل‌ده یاییلاجاق‌دیر.

سلیم موذن‌زاده‌نین اؤلومونه گؤره، بو هفته پنج‌شنبه، بوتون اردبیل‌ده عومومی عزا اعلام اولوب‌دور.

سلیم موذن زاده‌نین اؤلوموندن سونرا، اونو عزیزلمک اوچون ایش‌لر

اردبیل اوستانی‌نین “میراث فرهنگی” ایداره‌سی‌نین گنل مودورو، کریم حاجی‌زاده، سلیم موذن‌زاده‌نین ائوی‌نین آلینماسینی و موزه‌یه چئوریلمه‌سینی ایسته‌ییب‌دیر.

هابئله اردبیل امام جومعه‌سی آیت‌الله سید حسن عاملی، اردبیل بلدیه‌لیغیندن ایسته‌ییب‌دیر کی اردبیلین، خیابان‌لاری یا میدان‌لاریندان بیری‌سینه، بو اهل بیت‌چی مداحین آدی قویولسون.

رحمتلیک موذن‌زاده‌نین حیاتینا بیر باخیش

سلیم موذن‌زاده، اردبیلین، تازا شهر محله‌سینده، بیر مذهبی عاییله‌ده دوغولوب‌دور.

سلیم موذن‌زاده، ۲۰ یاشلیقیندان اذان دئمک، قورآن اوخوماق و مداحلیق‌لا مشغول اولوب‌دور و بعضی سؤزلره گؤره، هر گونونون ۵ ساعاتینی نوحه اوخوماق‌لار گئچیردیب‌دیر.

سلیم موذن‌زاده، داها چوخ تورک دیلینده نوحه اوخویوب‌دور و اونون مشهور “زینب زینب” نوحه‌سی، ایرانین تورک بؤلگه‌لری‌نین بوتون مسجیدلرینده سسله‌نیب‌دیر و سلیمین بیر دونیالیق آد قازانماسینا سبب اولوب‌دور.

بو بؤیوک مداح، ۱۳۹۱ – جی گونش ایلینده، اردبیل مصلی‌سیندا، تورکجه، فارسجا، عربجه‌دن علاوه، اینگیلیسجه‌ده ده نوحه اوخودو.

یول‌پرس بو بؤیوک اوستادین دونیادان کؤچمه‌سی اوچون، تانری‌دان بوتون اهل بیت سئون‌لرینه باش ساغلیغی دیله‌ییر.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *