عناوین مطالب:
خانه / آخرین اخبار / دوکتور جاواد هیئت، تورکون اونودولمایان‌ دوشونورو

دوکتور جاواد هیئت، تورکون اونودولمایان‌ دوشونورو

بوگون (مردادین 21 ی) اونلو تورک یازار، حکیم و جراح، آراشدیرماجی جاواد هیئتین اؤلومونون اوچونجو ایل دؤنومودور.

 

شایان هوشیار - کولتورل چالیشقان
شایان هوشیار – کولتورل چالیشقان

شایان هوشیار – یول‌پرس: دوکتور جاواد هیئت،۱۳۰۴-جو ایل‌ده تبریز شهرینده دونیایا گؤز آچدی.

ابتدائی،اورتا مکتب و دؤرد ایل‌لیک طب بؤلومونون ایکی ایلینی ایران‌دا، آردی‌نی ایسه ایستانبول‌دا گئچیره‌ن‌دن سونرا،

تخصص دؤوره‌سینی‌ده پاریس و ایستانبول‌دا گئچیریب، ۱۳۳۱-جی ایل‌ده ایرانا قاییدیب اؤنجه پیچاق‌، سونرا ایسه قلم‌له قوللوق ائتمه‌یه باشلامیش‌دیر…

تهران شهرینده ۳۴ ایل حکیم‌لیک‌ده، همین ساحه‌ده چوخلو اثرلر یارادیب  ۱۳۵۵-۱۳۴۳ ایل‌لری آراسیندا “دانش پزشکی” آدلی بیر درگی  چیخاراراق، حکیم‌لیک حاققیندا ۵۰دن آرتیق اولان علمی مقاله‌لر یازیب  تکجه ایران دئییل، بوتون تورک دونیاسی‌نین حکیم‌لیک ساحه‌سینه ائتکی بیراخاراق، قوللوق ائتمیش‌دیر!

رحمت‌لیک دوکتور هیئت، طب بؤلومونده نظر، باجاریق و تخصص صاحیبی اولدوغو کیمی، تورکولوژی ساحه‌سینده‌ ده خالقیمیزین آراسیندا اونودولمایان قوللوق‌چولاردان ساییلیر.

“وارلیق”درگی‌سی، تورکولوژی (کولتور،تاریخ و ادبییات باخیمیندان) ساحه‌سینده دوکتورون ان آدلیم قوللوق‌لاریندان‌دیر.

بو ده‌یرلی درگی، ایران ایسلامی اینقیلابی‌نین ظفر چالماسی و نؤکر پهلوی سولاله‌سینین محو اولدوغوندان سونرا، دوکتور هیئت و بیر نئچه یان-یؤره‌سینده اولان

تاریخ، دیل و ادبییات ساحه‌سینده تخصص‌لو و ده‌یرلی فیکیرداشلارینین واسیطه‌سی‌ایله ایشه باشلاییب  ایران تاریخینده، تورکجه درگی‌لر آراسیندا ان اوزون زامان آیاقدا درگی‌یه دؤنوشدورولدو.

رحمت‌لیک دوکتور جاواد هیئت‌ین بو درگی‌ده تورکولوژی حاققیندا یازدیغی مقاله‌لرین ساییسی ۷۰دیر.

دوکتورون اؤز دئدییی‌نه گؤره، بو درگی‌میزین ایکی دیل‌لی اولماسی‌نین سببی، خالقیمیزین کولتورل چتینلییینی باشقا هم‌یئرلی‌لره آنلاتماق ایدی!

بو تورکجه-فارسجا ده‌یرلی درگی‌میزین ۳۵-۳۴ ایل منظم شکیل‌ده یاییلماسی، خالقیمیزین دیل،ادبییات،تاریخ و… ساحه‌لرده بیلیمسل بیلگی آلماسی‌نا سبب اولوب، اونلاری اؤز وارلیغینا یییه دورماغا اولدوقجا هوس‌لندیردی.

پهلوی دؤورونده،شوونیست دوشونجه‌سی‌نین حاکیم‌لییی اساسیندا، تورک‌لرین گئرچه‌ک اوزونو گؤسترمه‌یه‌رک، اونلاری اؤزگه، آلچاق، اویغارسیز، چاپیب-بیچه‌ن و بو کیمی اؤزل‌لیک‌لرله تانیتدیرماق، تورک‌لرین و دیگر میللت‌لرین آراسیندا اؤزلرینه(تورک‌لردن)کین-نیفرت یاراتماق و بوتؤولوک‌ده آغاجی اؤز ایچین‌دن قورد یئدیرتمه‌ک ایسته‌مک، دئمه‌ک اولار کی، هر زامان‌دان چوخ و گرک‌لی اولدوغونا گؤره و کولتورل قوللوغون داها چوخ حیسس ائدیلمه‌سی‌نی گؤزه آلاراق، رحمت‌لیک دوکتور هیئت و دیگر فیکیرداشلاری قول چیرمالاییب دیل، ادبییات، تاریخ و

کولتور باخیمیندان ده‌یرلی و زنگین وارلیغیمیزی “وارلیق” درگی‌سی‌ایله اوزه چیخاریب  داها آرتیق تانیتدیرماغا قرار وئرمیش‌لر.

قورخودان کیمسه ا‌لینه تورکجه کیتاب آلا بیلمه‌ین زامان، رحمت‌لیک دوکتور هیئت و دیگر فیکیرداشلاری، وارلیغیمیزی اؤز آنادیلیمیزله خالقیمیزا تانیتدیریب، آنلاتماغا چالیشیردی و کیمسه، بو موقددس یول‌دا باشقاسیندان هئچ ‌نه گؤزله‌مه‌یه‌رک، کؤنوللوجه ‌چالیشیردی!

سایین دوکتور جاواد هیئت‌ین ده‌یرلی،فایدالی، موقددس و چالیشقانلیق‌لا دولو اولان عؤمرو، حکیم‌لیک و تورکولوژی ساحه‌سینده اونودولمایان و دونیانین بؤیوک اؤلکه‌لرینده، اونلار قایناق اولاراق تانینان اثرلر یاراتماق‌لا گئچیب ۱۳۹۳-جو ایل‌ده تانری‌نین سونسوز مولکونه کؤچوب اورادا قالارغی

اولموش‌دور.

رحمت‌لیک دوکتور هیئت‌ین ابدی ائوی، آذربایجان‌ جومهوریتی‌نین باکی شهرینده‌دیر.

-« آذربایجان ادبییات تاریخینه بیر باخیش، تورکجه،۱۳۵۸-جی ایل»

-«مقایسه اللغتین، تورکجه-فارسجا ، ۱۳۶۲-جی ایل»

-«سیری در تاریخ زبان و لهجه‌های ترکی، ۱۳۶۵-جی ایل»

-«آذربایجان شفاهی خلق ادبیاتی، ۱۳۶۷-جی ایل»

-«ادبیات‌شوناسلیق، ۱۳۷۴-جو ایل»
و

-«تورکلرین تاریخ و فرهنگینه بیر باخیش»

تورک‌شوناسلیق ساحه‌سینده دوکتورون یاراتدیغی اثرلردیر.

حکیم‌لیک ساحه‌سینده‌ده دوکتور هئیت‌ین موقددس ال‌لری ایله یارانمیش اثرلر، بونلاردیر:

-«ترومبوز،قلبیت و درمان آن، ۱۳۳۵-جی ایل»

-«جراحی عمومی، ۱۳۴۴-جو ایل»

-«درسهای جراحی،۱۳۷۶-جی ایل»

هابئله، دوکتورون فلسفه حاققیندا یاراتدیغی اثرین آدی:

-«خلاصه تاریخ فلسفه غرب»دیر!

بو قیسا یازی‌نین سونوندا آرتیرمالی‌ییق کی، رحمت‌لیک دوکتور هیئت‌ین تورکولوژی و حکیم‌لیک ساحه‌‌سینده تخصص صاحیبی اولدوغونا باخماساق‌ دا، اونو فلسفه و ایسلام‌شوناسلیق بؤلومونده‌ ده نظر و اثر صاحیبی گؤروروک!

بیر فاتیحه‌ رحمت‌لیک دوکتور هیئت‌ین ده‌یرلی روحونا سوناراق، اونو تانیماق،تانیتدیرماق،سئومه‌ک،سئودیرمه‌ک،یاد ائتمک و ائتدیرمه‌یه چالیشیب بو ایشی اؤزوموزه بؤیوک گؤرو بیلیب میللت‌یمیز بئله بیر اوغول‌لار یئتیشدیریب بوتون دونیایا، اؤزل‌لیک‌له تورک‌دونیاسی‌نا سوندوغو اوچون، ده‌یرلی خالقیمیزا گوون‌مه‌لی‌ییک…

یک دیدگاه

  1. آللاه رحمت اله سین

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *