خانه / آخرین اخبار / کرکوک ساواشینی کیم‌لر قازاندی، کیم‌لر اودوزدو؟

کرکوک ساواشینی کیم‌لر قازاندی، کیم‌لر اودوزدو؟

عیراق تورکمن‌لری بو گون‌لر بؤیوک بیر بلادان قورتولموش کیمی گؤرونسه‌لرده، باش‌لارینا گلمیش بو بلادا سوچسوز ساییلا بیلمزلر. عیراق کوردلرینین سیلاحلاندیق‌لاری زامان، بونلار، مرکزی حکومت بیزی قورویاجاق، دئیه عیراق حکومتینه بئل باغلادیق‌لارینا گؤره سیلاحلانماق یئرینه باش‌لارینی باشقا اومودلارا قاتدیلار.

محمد رحمانی‌فر – یول‌پرس: سیلاحلی ساواش‌لار سیاسی دارتیشمالاردان فرقیلی‌دیرلر. سیاسی دارتیشمالاردا هر ایکی طرف ده ، حتی نئچه طرفلی دارتیشمالاردا بوتون طرف‌لر ده، “بیز قازاندیق” سؤزونو دیله گتیره‌بیلرلر. آنجاق، گئنل اولاراق، سیلاحلی ساواش‌لاردا هر ایکی طرفین ده قازانماسی اولاناقسیز بیر اولای ساییلیر. البته، سیاسی دارتیشمالارین

محمد رحمانی‌فر – نویسنده و مترجم

ترسینه بو ساواش‌لاردا هر ایکی طرفین ده، حتی نئچه طرفلی ساواش‌لاردا بوتون طرف‌لرین ده، اودوزمالاری مومکون بیر اولای ساییلا بیلر. سوریه‌نین ایندیکی دورومونو هابئله ایران‌لا عیراقین قاباقکی ساواشینی بو سؤزومون آیدین اؤرنک‌لری کیمی دوشونمک اولار. آنجاق، منجه کرکوک ساواشینین آیدین قازانان‌لاری عین حالدا آیدین اودوزان‌لاری واردیر.

سؤزسوز، ایران اسلام جمهوریتی ایله عیراق حاکمیتی بو قیسا ساواشین اصلی قازانان‌لاری، کوردلر ایسه بو ساواشین اصلی اودوزان‌لاری ساییلیرلار. آنجاق، بو ساواشین باشقا اودوب اودوزان‌لاری دا واردیر. بو قیسا یازی‌دا بو قونویا توخونماق ایسته‌ییرم. کوردلرین، اؤزل‌لیک‌له، بارزانی‌لرین بو ساواشدا اودوزمالاریندا هئچ سؤز یوخدور. حتی اونلارین اودوزمالاری ساده‌جه اشغال ائتدیک‌لری توپراق‌لاری الدن وئرمک‌له سونا چاتماییر. اونلار ایل‌لر بویو کرکوک-و بیر کورد شهری کیمی تانیتدیرماغا چالیشمیشدیلار. حتی رفراندوم قونوسوندا کرکرک‌لولارین گئنیش سویه‌ده بو رفراندوما قاتیلمالاریندان سؤز آچیب، بو قونودا یانلیش خبرلر اویدورموشدولار. بیر حالدا کی شهر اونلارین الیندن چیخدیقدا خیاوان‌لارا تؤکولن، شادلیق ائدن تورکمن‌لر او ادعالارین یانلیش اولدوغونو گؤستردیلر. هله بارزانی بوندان سونرا اؤز مخالیف‌لری طرفیندن حتی عادی کوردلرین طرفیندن آغیر باسقی‌لارلا قارشیلاشاجاق‌دیر. باشقا یؤندن بارزانی رفراندوم قومارینا قوشولدوغونا گؤره اؤزونون قاباقکی یولداش‌لارینی دا (ایران،ترکیه) الدن وئرمیش کیمی گؤرونور.  دئمک بو سیاسی-نظامی قوماردا اودوزماق، بارزانی‌یه چوخا باخاجاق‌دیر.

عیراق کوردوستان ایقلیمی، بارزانی باشدا اولماقلا، بو ساواشین اوست قاتدا گؤرونن اودوزانی اولسا دا، یوخاری‌دا وورغولادیغیم کیمی بو ساواشین باشقا اودوزان‌لاری دا واردیر. آمریکا ایله اسرائیل ایل‌لر بویودور “یئنی اورتادوغو” سیاستینی ایره‌لی سوردورمک‌له، اورتادوغوداکی اؤلکه‌لری پارچالاماق آماجی ایله “کوردوستان” آدلی بیر اؤلکه یاراتماق آماجیندادیرلار. اصلینده، بؤلگه‌میزده باش وئرمیش اولای‌لارین چوخو بو سیاستین بولاغیندان سو ایچیرلر. بو سیاستین سونوجو اولاراق، کوردلر باتی اؤلکه‌لرینه باغلی اولان مدیادا گونو گوندن آرتیق تبلیغ اولماقدادیرلار. بو سیاستین سونوجو اولاراق، کوردلر باتی اؤلکه‌لرین ال‌لری ایله گونو گوندن آرتیق گوجلنمکده‌دیرلر. داعیش ماهناسینا اونلاری گوجلندیرمک هابئله اونلارا آغیر سیلاح‌لار وئرمک بو سیاستین اوغروندا دوشونولمه‌لی‌دیر.

آمریکا هئچ زامان آچیق شکیلده عیراق کوردوستانین باغیمسیزلیق رفراندومونا قارشی چیخمادی. یالنیز، ایندی واقتی دئییل، دئیه اونلاری بیرآز دوشونمه‌یه چاغیردی. آمریکا بو رفراندوما قارشی اولسایدی، بو رفراندوم باش توتا بیلمزدی. آمریکانین ترسینه اسرائیل چوخ آچیق شکیلده رفراندومو ساووندور. رفراندوم گون‌لری اسرائیل بایراغی کوردوستان بایراغی ایله بیرگه بو بؤلگه‌ده دالغالانماقدایدی. دئمک، ان آزی ایندیکی دورومدا، آمریکا ایله اسرائیل بو اولای‌لارین اودوزانی ساییلیرلار. بونو بیز باتی مدیالاریندا دا گؤره بیلیریک. کرکوک-ون نفت قایناق‌لاریندان الی کسیلمیش کوردوستان آمریکا ایله اسرائیلی او قدر ده ماراقلاندیرا بیلمز. باخمایاراق کی بو سؤزلر، “یئنی اورتادوغو” سیاستینین اودوزماسی دئمک دئییل. سؤزسؤز، بو اؤلکه‌لر بو سیاستی ایره‌لی سوردورمه‌یه چالیشاجاق‌لار. اونلار بو سیاسته دایاناراق، داها اؤنملی ماراق‌لارین پئشینده‌دیرلر. کوردلر ایسه بو ماراق‌لاری دوغرولتماق اوغروندا اونلارین الینده یاخشی بیر توتالغا (ابزار) اولا بیله‌جک‌لرینی گؤستریبلر.

ایران-ین رسمی حکومتی بو ساواشین اؤنملی قازانانی ساییلسا دا، سون ایل‌لرده حتی حاکمیت-ین بیر سیرا قات‌لارینا نفوذ ائده بیلن پان‌فارسیست‌لر بو ساواشین اودوزانی ساییلیرلار. هامیمیز رفراندوم گون‌لرینده بونلارین نه قدر سئوینجک اولدوق‌لارینی گؤروردوک. گئنل اولاراق پان‌فارسیست‌لر اؤزلرینی قوروماق اوچون بیر ده ایرانداکی باشقا دیل‌لری بوغماق اوچون اؤزلرینی ایرانچی کیمی گؤسترمه‌یه چالیشیرلار. سانکی، بونلارین لاپ اؤنملی آماج‌لاری ایرانین تورپاق بوتؤولویونو قوروماقمیش. آنجاق، بونلارین نه تکجه حکومتین رسمی ایدئولوژی‌سی ساییلان “اسلام” دینی ایله تمللی سورون‌لاری واردیر، بلکه بو قونودا ایرانین بوتؤولویونو هده‌له‌ین بیر اولای‌لا آیاقلاشمالاری بیر داها گؤستردی کی ایرانین تورپاق بوتؤولویونو قوروماق دا بونلار اوچون او قدر اؤنملی دئییلمیش. دئمک، بونلار اصیل عیرقچی اولدوقلارینی اوزه چیخارتدیلار. بونلار گؤستردیلر کی یئری گلسه نه تکجه اسلامی بلکه ایرانی دا قوندارما عیرقچی-آریاچی ایدئولوژی‌لرینه قوربان وئررلر. منجه، بونلارین رفراندوم زامانی یازدیق‌لاری یازی‌لاری، هابئله گؤردوک‌لری ایش‌لر اونودولمامالی‌دیر. اؤزل‌لیک‌له، ایران حکومتی دوست-دوشمنی تانیماق اوچون بو قونودا داها آرتیق دوشونمه‌لی‌دیر.

اَیری اوتوروب، دوز دانیشماق ایسته‌سک بو گونکو سئوینجک‌لیییمیزه باخمایاراق بیز تورک‌لر ده بو اولای‌لارین اودوزانی ساییلیریق. “بیز تورک‌لر” دئدیییمده، ایران آذربایجانی ایله تورکیه‌دن باشقا بوتون تورک دونیاسینی وورغولاماق ایسته‌ییرم: کرکوکدان توتدو تورکوستانا قدر. سؤزلریم کیمسه‌نی چاشباش سالماسین دئیه، بو قونونو داها آچیق شکیلده آچیقلاماق ایسته‌ییرم.

منجه، ایران آذربایجانیندا تورک‌لر آز امکان‌لارینا باخمایاراق، بو یولدا ال‌لریندن گله‌نی اسیرگه‌مه‌دیلر. ذاتن ده بونلارین الیندن چوخ بیر ایش گلمه‌ییردی. تورکیه ده ایستر حکومت باخیمیندان ایستر مدنی توپلوم باخیمیندان بو قونودا یاخشی چالیشدی. بلکه، چوخلاری تورکیه‌دن عیراق-ا قوشون چکمک اوموردولار. آما اونوتمایالیم کی سیاسی آلان‌لار اؤزل‌لیک‌له بو قونویا باغلی اولان آلان‌لار چوخ پیرتلاشیق‌دیرلار. تورکیه‌نین اولتیماتوم‌لاری هابئله بارزانی‌یه قارشی سرت اویاری‌لاری اولماسایدی، دوروم باشقا جوره ده اولا بیلردی. باشقا یؤندن بو گون الده ائدیلمیش بو سونوج تورکیه-ایران-عیراق ایش‌بیرلییی‌نین سونوجو دا ساییلا بیلر. اردوغانین تهرانا گلمه‌سی، ایکی اؤلکه‌نین سیخ-سیخ دیپلماتیک باغلانتی‌لاری، کوردوستان ایقلیمینی باسقی آلتینا آلمالاری بونلارین اورتاق ایش‌بیرلییی‌ آپارمالارینین گؤسترگه‌لری ساییلا بیلر. باخمایاراق کی، منجه هر ایکی اؤلکه ده، بوندان داها تئز بو خطری آلقیلاییب، چؤزمه‌یینی دوشونمه‌لی ایدیلر. آنجاق، دئدیییم کیمی بو ایکی تورک توپلوموندن باشقا تورک دونیاسی بو قونودا یئترینجه چابا گؤسترمه‌دی.

آذربایجان جمهوریتی بو قونودا تام اودوزموش بیری ساییلیر. ایستر حاکمیت سویه‌سینده، ایستر مدنی توپلوم سویه‌سینده. یازیق‌لار اولسون کی بونلارین هئچ بیریندن هئچ بیر ائتگیلی ایش گؤرونمه‌دی. گئجه گوندوز “فضولی”دن دانیشان‌لار، گئجه گوندوز “فضولی مزاریندان” سؤز آچانلار، نه یازیق کی بو قونودا سوسموش کیمی گؤروندولر. منیم بو سؤزلریم بیر سیرا یولداش‌لاری اینجیده بیلر. آنجاق، بیلدییینیز کیمی من هئچ کیمسه‌یه هئچ بیر اورقانا هئچ بیر اؤلکه‌یه باغلی اولمایان اؤزگور بیر یازیچی‌یام. یازی‌لاریمدا ایسه آجی گئرچک‌لری گیزلتمه‌یی بؤیوک بیر خیانت بیلیرم. بیز تاریخدن درس آلمالیییق. تاریخدن درس آلماق اوچون ایسه تاریخده باش وئرمیش اولای‌لاری سانسور ائتمه‌دن قورخمادان آراشدیرمالیییق. آذربایجان جمهوریتی حتی ائتگیلی معنوی دسته‌یینی ده کرکوک‌لو باجی-قارداش‌لاریندان اسیرگه‌دی. بونو یاخشی باشا دوشمک اوچون کورد ایش‌بیرلییینی گؤز اؤنونه آلمالیییق: کوردلر سیاسی جغرافیایی سینیرلارا باغلی اولمادان هر زامان بیربیرلرینه دایاق دوروبلار. آما نه یازیق کی عیراق تورکمن لیدئرلرینین مظلومانه چاغیریش‌لاری دا نه آذربایجان‌داکی مدنی توپلومو نه ده بو اؤلکه‌نین باشکندینده‌کی حکومتی ائتگیلی بیر ایشین ایچینه سوروکله‌یه بیلمه‌دی.

عیراق تورکمن‌لری بو گون‌لر بؤیوک بیر بلادان قورتولموش کیمی گؤرونسه‌لرده، باش‌لارینا گلمیش بو بلادا سوچسوز ساییلا بیلمزلر. عیراق کوردلرینین سیلاحلاندیق‌لاری زامان، بونلار، مرکزی حکومت بیزی قورویاجاق، دئیه عیراق حکومتینه بئل باغلادیق‌لارینا گؤره سیلاحلانماق یئرینه باش‌لارینی باشقا اومودلارا قاتدیلار. ییرمی ایلدن آرتیق‌دیر عیراق قارماقاریشیق بیر دوروم یاشاییر. ندن بو قارماقاریشیق‌لیق‌دا بونلار اؤزلرینی ساوونا بیله‌جک قدر سیلاحلانمادیلار؟ بونلارین چوخو شیعه‌دیرلر. هر ایل محرم‌لیک‌ده هم اؤزلری عزا ساخلاییرلار، هم ده ایراندان اورا گئدن عزالیلارا فرقیلی-فرقیلی یئمه‌لی‌لردن-ایچمه‌لی‌لردن احسان‌لار وئریرلر. آنجاق، ندن بونلار شیعه‌لرین ایلک امامی ساییلان حضرت علی‌نین ” صولحو سئویرسنسه، ساواشی دوشون!”  دئیه، سؤزونو اونوتموشلار؟ بونلارین ایچینده چوخلو شاعیرلرده وار. آنجاق ندن رحمتلیک زهتابی‌نین “افسانه‌دی شمشیره دایانمازسا آزادلیق” شعری بونلارین قولاغینا چاتماییب‌دیر؟ سؤزون قیساسی بو کی عیراق تورکمن‌لری صولحو سئویرلرسه، اؤزگور یاشماق ایسته‌ییرلرسه سیلاحلانمالی‌دیرلار. اونلارین سیلاحلانمالاری نه تکجه عیراق-ین تورپاق بوتؤولویونو هده‌له‌مه‌یه‎جک، بلکه اونلارین ژئوپلیتیک هابئله ژئواستراتژیک دوروم‌لارینا گؤره بو ایش عیراق اؤلکه‌سینین تورپاق بوتؤولویونون قورونماسینین ضامینی ساییلا بیلر. بونا گؤره ده عیراق حاکمیتی اونلارین گوجلنمه‌سیندن یانا اولا بیلر.

سون سؤز: کرکوک اولای‌لاری بو اولای‌لاردان قازانان‌لارا دا، بو اولای‌لاردا اودوزان‌لارا دا بؤیوک درس اولا بیلر. بو اولای‌لاردان دوزگون درس آلماق اوچون، بونلاری سانسور ائتمه‌دن آراشدیرمالیییق. سانسورلو آراشدیرمالار، قورخولو آچیقلامالار بیزلری یانلیش سونوج‌لارا سوروکله‌یه بیلر.

۳ دیدگاه‌ها

  1. بو گوزل مقاله نی و تورکجه نی غلط سیز یازدیغینیز اوچون تشکر ائلیرم




    2



    0
  2. چوخ گؤزل یازیدی وار اولون.
    بیر سؤز وار دئییر “آدام اومدوغو یردن کوسر”. عراق تورکلری بوتون تورکلردن مخصوصا تورکیه و آزربایجان جومهوریتیندن گؤزلنتیلری اولدو. نه تکجه آزربایجان منجه تورکیه ده گؤزله نیلن کیمی قاباغا چیخمادی.
    تورکیه(حوکومت) عیراق تورکلری مساله سینده تامامیله پسیو بی وضعیت ده قالدی.
    عیراق تورکلری اؤزلری اؤزلرینه بیر ایش گؤرمه سه هچ کیم گؤرمویه جک.
    عیراق اوردوسونون یاراتدیقی بو فورصت و کرکوکون آزادلیغا قوشولماسی اینشاللاه اولارین ایشینه یارار و اؤزلرینی توپارلاییب هم عیراق توپراق بوتونلویونو همده اؤز وارلیقلارین قورویارلار.




    2



    0
  3. (yaşasin TURK Elim)
    💗💗💗💗💗💗💗💗

    یوسف شاکر
    استان گیلان




    1



    0

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *