خانه / آخرین اخبار / ۲واحید اختیاری درس عظمتلی آذربایجان تورکجه‌سینه ”هئچ“ آنلامیندا بیر شئی‌دیر
اسماعیل مددی(اولکر) اورمو بیلیم یورودونون تورکجه دیل و ادبیات اوستادی:

۲واحید اختیاری درس عظمتلی آذربایجان تورکجه‌سینه ”هئچ“ آنلامیندا بیر شئی‌دیر

اسماعیل مددی(اولکر) یول پرس‌ایله آپاردیغی سؤیلش‌ده دئدی: کوردیستان بؤلگه‌سینده کی کوردلریمیز 5 ایلدن چوخدور اؤز آنا دیللرینی فارس دیلینین یانیندا اوخویورلار. دئمک، یوخاریدا تماس ائتدیییم آنایاسامیزین ان آزیندان بیر مادّه سی اورادا، او بؤلگه ده تحقّق تاپمیشدیر. بو حاقّین، آذربایجان و تورک اوتوران بؤلگه‌لرده ده گئرچکلشمه سی گرکیر! آنجاق دوستلاریمیزین، دولت آداملاریمیزین و سیزین ده بیلدیینیز کیمی بیزیم بو خصوصداکی علمی کادریمیز اسکیکدیر.

یول‌پرس: بیلدییینیز کیمی ۳ ایلدیر اورمو اونیئورسیته‌سینین ادبیّات فاکولته‌سینده استانبول تورکجه‌سی دیل و ادبیّات لیسانس بؤلومو آچیلیب و اوخودولماغا باشلانیبدیر کی اورمیه‌ بیلیم چئورسی اوچون بؤیوک باشاریدیر.

ایرانین ائییتیم تاریخینده نئچه ایل اؤنجه دن ساده جه “علّامه طباطبائی” اونیئورسیته‌سینده استانبول تورکجه‌سی ادبیّات بؤلومو آچیلمیشدیر. اوندان سونرا اورمیه اونیوئرسیته‌سینه گلدی. بو، اورمونون ادبی چئوره سینه و تاریخینه بؤیوک باشاری و اوغوردور. منجه اورموداکی اؤیرنجیلریمیز جغرافی و ائتنیک قونوملاریندان دولایی تهرانین علّامه طباطبایی اونیوئرسیته‌سیندن داها باشاریلی، داها قاباغجیل و داها اونجول بیچیمینده قاباغا گئدیرلر. اورمیه نین علّامه طباطبائی دن ده داها گوجلو اؤیرنجی‌لریمیزی جامعه، ادبیات و دیل توپلومونا تحویل وئرمه سینی اومود ائدیرم. انشالله بونون اولماسینی من و بوتون اوستادلاریمیز آرزیلیریق.

استانبول تورکجه‌سینین اوچونجو ایلیندن یعنی بیلدیردن ایکی واحید آذربایجان دیل و ادبیّاتی درسی قویولماسی‌نین زومزومه‌سی واریدی. بیزلر یایدان بونون جریانیندا وار ایدیک. خوشباختلیقدان بو قدیم آرزیمیز اؤنملی دیله ییمیز و اؤز نوعوندا تاریخی ایش، هم اورمیه‌نین ادبیّات فاکولته‌سینده هم ده نازلو اونیوئرسیته‌سینده گئرچکلشدی. اورمیه نازلو اونیوئرسیته‌سینده ایکی کرئدیلیک سئچنکلی (اختیاری) آذربایجان تورکجه سی درسیمیزه یوز کسور اویرنجیمیز ائییتیم آلماقدادیر. اورادا ایکی صینیفیمیز (کیلاس) واردیر. ادبیّات فاکولته‌سینده کیلاسلاریمیزدا ایسه اؤیرنجیلریمیزین ساییسی نورمالدیر. هر کیلاس ۲۰ نفردن اولوشور. یعنی اورمودا، توپلام ۱۴۰ (یوز قیرخ) جیواریندا بوتون بؤلوملردن اؤیرنجیلریمیز اشتراک ائدیر. اؤیرنجیلریمیزین قاتیلیمی اولدوقجا صمیمی و ایچدندیر. اونلارلا بیلگی آلیش-وئریشیمیز ده وئریملی، گؤزل و اولوملو قاباغا گئدیر. گؤزل نتیجه لر آلا بیلمه یی اومود ائدیرم.

اؤیرنجیلرین ایستیقبالی فوق العاده یاخشیدیر. ۲۰ ایله یاخیندیر کی من ایستر سربست و ایستر اؤزل اؤیرنجی یئتیرمکده یم. اساس ایشیم تورکجه نین بو ایکی لهجه سینی اوخوتماقدیر. من اؤیرنجی ترانسفرینده ایشله ییب دانشگاه اورتامیندا بؤیوموش بیر اینسان اولاراق، بو دیل یا دا دیللری بو حرارتده و بو گؤزللیکده قارشیلاماغا  تانیق اولمامیشدیم دوغروسو… بونا گؤره چوخ سئوینیرم و الیمیزدن گلدییی قدر بو ایستی استیقبالین قارشیلیغینی حاققیلا وئرمه یه چالیشیریق.

باشقا استادلار فوق العاده مثبت قارشیلاییرلار. من اؤزوم اؤز نوعومدا بیر متخصّص و ایللر بویو شاگیردلر و اؤیرنجیلرله ایچ ایچه اولان بیر انسان اولاراق قارشیلامانی فوق العاده ایستی گؤرورم. آنجاق بوتون کیلاسلاردا، باشقا همکارلارا و فاکولته باشقانلارینا دا دئمیش اولدوغوم کیمی بو ۲ واحید، بو عظمتده دیل و ادبیّات اوچون “هئچ” نئجه لییینده بیر شئیدیر. بو درینلیک و انگینلیکده بیر دیل و ادبیّاتدان آنجاق ۲ واحد اوخوماق دنیزدن بیر چومچه، خرمندن بیر سیخیم ماهیتینده دیرکی بیزجه چوخ چوخ چوخ آزدیر. اومودوموز وار بو درسین اؤن لیسانس(فوق دیپلم)ی، لیسانسی، یوکسک لیسانسی و دوکتوراسی مملکتیمیزده اوخودولسون و اوخوسون.

تبریز اونیوئرسیته سینده بیلدیردن بو رشته نین لیسانسی اوخونور. ایندی ایکینجی ایله گئچدیلر. اؤنوموزده کی ترمدن یا دا ان گئج، اؤنوموزده کی ایلدن اورمیه شهرداریسینه باغلی اولان “علمی کاربردی اونیوئرسیته” سینده “آذربایجان تورکجه سی دیلی و ادبیاتی” درسلری اوخودولاجاقدیر. بؤلومون آچیلماسینین مجوّزی ۸ ایل اؤنجه آلینیبدیر! یازیق کی بیلمه دیییمیز یا دا بیلمک بئله ایسته مَدیییمیز ندنلره گؤره بو گونوموزه قدر بو آرزو گرچکلشمه ییبدیر… بیلدیینیز کیمی بو رشته نین “لیسانس مقطعی” تایید اولوبدور. آمّا بونلار فوق دیپلم آشاماسینی اوخوتماق ایسته دیکلری اوچون بیر داها آموزش عالی دن تایید آلمالیدیرلار. بو ترمی یوباندیغیمیزین دا ندنی بونون تائید اولونماغا گؤندریلمه مسئله سیدیر. بیز بو زحمتی دیرلی دوستوم دکتر میر علی رضایی جنابلارینین بوینونا سالدیق و اونون آراجیلیغیلا لیسانس درسلرینی بؤلوب و ۱۴۷ کرئدیلیک اولان درسلری اؤن لیسانس حدّینه اویغونلاشدیردیک… علمی کاربردی دانیشگاهیندا اولان همکارلاریمیز درس آدلاری و کرئدیت ساییلارینی آموزش عالی یه گؤندریبلر… آللاه قویسا اؤنوموزده کی گونلرده تایید اولوب و مجوّزی گلمکده دیر بلکه ده گلیبدیر چون ایکی گون اونجه تماس توتوب و بیر جلسه قراری قویدولار، انشالله گلن سومستری(ترمین)ن اوّلیندن آذربایجان دیلی و ادبیاتی فوق دیپلومو علمی کاربردی اونیوئرسیته سینده درس دئیلمه سی باشلایار… هر باخیمدان یاخشی اولاجاغیندان آرخایینام.

دولت آداملاری یا دا سیزین دئییشینیزله “دولت مرد”لریمیز، حتماً کی مملکت مصلحتلرینین فیکرینده‌دیرلر. شبهه سیز بیلیرسینیز کی ایران بیر “چند ملیّتی” مملکتدیر. بو تشبّث ایسه آنا یاسامیزین اون بئشینجی و اون دوققوزونجو مادّه‌لرینین گئرچکلشدیرمه‌سی اوغروندا اولان بیر فعالیّتدیر. بیز دؤنه-دؤنه دولت آداملاریلا دانیشیقلاریمیزدا اونلارا بیلدیرمیشیک کی: مملکتیمیزین پیشرفتی و ایره لیله ییشی، میللیّتلرین ائشیت شرطلرده ائییتیم آلمالاریندان گئچر، اینسانلاریمیزین آنادیللرینین اؤیرنمه‌سی اونلاری داها آرتیق یوردوموزا، تورپاغیمیزا باغلاییب، قارداشلاریق و ائشیتلیک دویغوسونو اینسانلاریمیزین آراسیندا چوخالدار… منجه آنا دیللرین اوخودولماسی و دیریلدیرمه‌سی و ملّیتلرین ادبیّاتلارینین داها زنگینلشدیریلمه‌سی بیزیم قارداشلیغمیز و دوستلوغوموزا بؤیوک دستکدیر یعنی اتّحاد و قارداشلیق شرطلرینین بیریدیر. نفاق شرطی دئییل. اونا گؤره ‌ده بیزلر بو اسکی آرزینی گرچکلشدیرمک اوغروندا چالیشمالیییق و چالیشیریق دا.

کوردیستان بؤلگه‌سینده کی کوردلریمیز ۵ ایلدن چوخدور اؤز آنا دیللرینی فارس دیلینین یانیندا اوخویورلار. دئمک، یوخاریدا تماس ائتدیییم آنایاسامیزین ان آزیندان بیر مادّه سی اورادا، او بؤلگه ده تحقّق تاپمیشدیر. بو حاقّین، آذربایجان و تورک اوتوران بؤلگه‌لرده ده گئرچکلشمه سی گرکیر! آنجاق دوستلاریمیزین، دولت آداملاریمیزین و سیزین ده بیلدیینیز کیمی بیزیم بو خصوصداکی علمی کادریمیز اسکیکدیر. یعنی آکادئمیک باخیمدان بیزیم ائییتیلمیش و اؤز آنادیلینده ساوادلی و اؤیرتمن صفتی داشییا بیله جک آداملاریمیز بارماق سایسیندادیر. بئله جه بو اوغوردا بیرینجی آددیمیمیز: اؤیرتمن یئتیشدیرمکدیر.

“آذربایجان تورکجه‎سی” بؤلومونون “علمی کاربردی”‌ده قویولما ندنلریندن بیری فوق دیپلم حددینده بللی بیر کادر یئتیشدیرمکدیر. او کادر تربیت معللیم کیمین باشلاییب معللیم لری تربیت ائلسین و او معلییم لر تورکجه نی متودیک بیچیمده اؤیرندیکدن سونرا آنادیلیمیزی کیلاسلاردا درس وئرمه یه باشلایاجاقلار.

دئدیییم کیمی کی گلن ترمدن علمی-کاربردی دانشکده سینده “آذربایجان دیل و ادبیاتی” رشته‌سی قورولاجاقدیر. علمی کادریمیزده دیلیمیز فوق دیپلم سطحینده تدریس ائدیله جکدیر. منیم اورمودا، تبریزده، سولدوزدا اؤز صینیف آرخاداشلاریم واردیر… یعنی علمی کادریمیز حاضیردیر.

میللت و دولت آداملاری‌نین ایچینده مرجع و یا قایناق کیتابیمیزین آزلیغیندان سؤز گئدیر آرا سیرا!.. بو، تام آنلامیلا یئرسیز بیر دغدغه دیر. بیزیم بول بول آنا و قایناق کتابیمیز واردیر… آیریجا یوزلرجه دکترا تئزی یازیلاجاق قدر ال دیمه میش و تام آنلامیلا “بکر” تز قونوسو آراشتیرماچیسینی گؤزله مکده دیر…

یئری گلمیشکن اورمیه ادبیّات فاکولته سی رئیسی جناب “طلوعی آذر”ه و نازلی دانشگاهی رئیسی و آموزش اداره سینه جان و کؤنولدن تشکرلریمی بیلدیریرم…

۳ دیدگاه‌ها

  1. آنا دیلی گئرک ایلک اوخولدان ( ابتدایی دن ) اولا یوخسا هئچ فایداسی یوخدی ، بیرده بیز تورکلری فارث فاشیستلری هئچ بیر چاغی حقلریمیزی وئرمییبلر و وئرمیئجاقلار چونکی تورک دیلی ومیلتینن دوشمن چیلیخلاری واردی ،
    بیزده یا حاقیمیزی الاجایق یادا کی باشقا چاره میز یوخدی موستقیلیق واوزگورلوقوموزی المالیق
    یاشاسین تورک میلتی




    3



    0
  2. آذربایجان وپیرامون-در انتظار بهار

    سلام-اگر به دانشجویانی که زبان وادبیات فارسی را در دانشگاه تحصیل می کنند بگویند بعد از اتمام دوره تحصیل هیچ فرصت شغلی نخواهند داشت مطمئن باشید بیش از۹۹ در صد آنها تغییر رشته می دهند-وقتی دانشجویانی در رشته تورکی پذیرش می کنند این بندگان خدا بعد از اتمام تحصیل فرصت شغلی ندارند و از طرفی با توچه به دیدگاه های تبلیغی فعلی با آنها به عنوان تجزیه طللب خواهند نگریست لذا پیشنهاد می کنم تا زمانیکه تدریس زبان تورکی در مقاطع ابتدائی و متوسط وعالی همگانی واجباری مانند زبان فارسی نشده به خاطر معلاش آینده خود تغییر رشته دهند




    1



    2
    • دیل اویرنمک بو گون هر بیر آزربایجان تورکو ایچین بیر اونملی ایش دیر. بو دیلی باشقا تورک اوولادلارینادا اویرتمک ایش اوسته ایش دیر.
      فارث دیلینه چاتینجا بیر دایاز سودا اوزمک کیمی دیر. اوزمک ایسته ییرسن آما اوزه بیلمیرسن. تورکجه میز بیر درین دنیز کیمیدیر. اوزمک باجارمایان موطلق بوغولاجاقدیر.




      0



      0

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *